ചക്രവാതച്ചുഴി തുടരും; മഴ ശക്തമാകും

തിരുവനന്തപുരം | അറബിക്കടലിൽ രൂപപ്പെട്ട ചക്രവാത ചുഴിയുടെ ഫലമായി ശനിയാഴ്ച വരെ മഴ തുടരുമെന്ന് കേന്ദ്ര കാലാവസ്ഥാ വകുപ്പ്. ഇന്നലെ വരെ തെക്കൻ ജില്ലകളിൽ മഴക്ക് കാരണമായ കാറ്റിന്റെ ഗതി വടക്കൻ ജില്ലകളിലേക്കും ശക്തിപ്രാപിച്ചിട്ടുണ്ട്. മഴ ശക്തിപ്പെടാൻ കാരണമായ ചക്രവാതച്ചുഴി രണ്ട് ദിവസം കൂടി നിലനിൽക്കാൻ സാധ്യതയുണ്ട്.

ഓറഞ്ച് ജാഗ്രത
ഇന്ന് ഒമ്പത് ജില്ലകളിൽ ഓറഞ്ച് ജാഗ്രതയും രണ്ട് ജില്ലകളിൽ മഞ്ഞ ജാഗ്രതയുമാണ്. ഇടുക്കി, എറണാകുളം, തുശൂർ, പാലക്കാട്, മലപ്പുറം, കോഴിക്കോട്, വയനാട്, കണ്ണൂർ, കാസർകോട് ജില്ലകളിലാണ് ഓറഞ്ച് ജാഗ്രത പ്രഖ്യാപിച്ചത്. ആലപ്പുഴ, കോട്ടയം ജില്ലകളിലാണ് മഞ്ഞ ജാഗ്രത.
മധ്യ കിഴക്കൻ ബംഗാൾ ഉൾക്കടലിൽ ന്യൂനമർദം രൂപപ്പെടാനും സാധ്യതയുണ്ട്. ഇന്ന് ഉച്ചയോടെയാകും ന്യൂനമർദം രൂപപ്പെടുക. ഇതിന്റെ സ്വാധീന ഫലമായി വരും ദിവസങ്ങളിലും കേരളത്തിൽ ശക്തമായ മഴ തുടരുമെന്ന് കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നൽകി.
കേരള- ലക്ഷദ്വീപ് തീരങ്ങളിൽ ഇന്ന് മണിക്കൂറിൽ 40 മുതൽ 50 വരെ കിലോമീറ്റർ വരെ വേഗത്തിലും നാളെ മണിക്കൂറിൽ 45 മുതൽ 55 വരെ വേഗത്തിലും കാറ്റിന് സാധ്യതയുണ്ട്. ഈ ദിവസങ്ങളിൽ ഇവിടെ മത്സ്യബന്ധനത്തിന് വിലക്കുണ്ട്.

source https://www.sirajlive.com/the-cyclone-will-continue-the-rain-will-be-heavy.html