ഉപഭോക്താക്കൾക്ക് കുറഞ്ഞ നിരക്കിൽ ഇന്റർനെറ്റുമായി പി എം വാണി

കൊച്ചി | കേരളത്തിലാദ്യമായി ജനങ്ങൾക്ക് കുറഞ്ഞ നിരക്കിൽ ഇന്റർനെറ്റ് ലഭ്യമാക്കാനൊരുങ്ങി പ്രധാനമന്ത്രിയുടെ വൈഫൈ ആക്‌സസ് നെറ്റ്‌വർക്ക് ഇന്റർഫേസായ പി എം വാണി പദ്ധതി. ടെലികമ്മ്യൂണിക്കേഷൻസ് ഡിപ്പാർട്ട്‌മെന്റിന്റെയും സെന്റർ ഫോർ ഡവലപ്‌മെന്റ് ഓഫ് ടെലിമാറ്റിക്‌സിന്റെയും സഹകരണത്തോടെ വേൾഡ് ഷോർ നെറ്റ്‌വർക്‌സ് പ്രൈവറ്റ് ലിമിറ്റഡാണ് പദ്ധതി നടപ്പാക്കുന്നത്. ടെലികമ്മ്യൂണിക്കേഷൻസ് ഡിപ്പാർട്ട്‌മെന്റ് സീനിയർ ഡെപ്യൂട്ടി ഡയറക്ടർ ജനറൽ ഡോ. പി ടി മാത്യു പദ്ധതി പുറത്തിറക്കി.

സൗത്ത് സ്‌റ്റേഷന് സമീപമാണ് ആദ്യത്തെ വേൾഡ്‌ഷോർ വൈഫൈ ഹോട്ട്‌സ്‌പോട്ട് സ്ഥാപിക്കുക. ചെറിയ മുതൽമുടക്കിൽ ഗ്രാമീണ മേഖലയിൽ പി എം വാണി മുഖേന വേൾഡ്‌ഷോർ ബ്രോഡ്ബാന്റ് ഇന്റർനെറ്റ് ലഭ്യമാക്കും. ഉപഭോക്താക്കൾക്ക് ചെറുതും താങ്ങാവുന്നതുമായ നിരക്ക് നൽകി മികച്ച പ്ലാനുകൾ നേടാനാകും. ട്രാവൽ, ടൂറിസം, സോഫ്റ്റ്‌വെയർ ഡെവലപ്‌മെന്റ് മേഖലകളിലും ഇന്റർനെറ്റ് സേവന രംഗത്തും വ്യക്തിമുദ്ര പതിപ്പിച്ച വേൾഡ്‌ഷോർ തിരുവനന്തപുരം ടെക്‌നോപാർക്ക് കേന്ദ്രമായാണ് പ്രവർത്തിക്കുന്നത്.

ഡിജിറ്റൽ സേവനങ്ങൾ ലഭ്യമാക്കുന്നതിന്റെ ഭാഗമായി കൂടുതൽ വൈഫൈ ഹോട്ട്‌സ്‌പോട്ട് സേവന കേന്ദ്രങ്ങൾ രാജ്യത്താകമാനം തുടങ്ങാനാണ് പദ്ധതി കൊണ്ട് ലക്ഷ്യമിടുന്നത്. കൂടുതൽ ജനങ്ങൾക്ക് ഇന്റർനെറ്റ് സേവനങ്ങൾ ലഭിക്കാൻ ചെറിയ ഡാറ്റാ ഓഫീസുകളാണ് സ്ഥാപിക്കുക.
മുമ്പുകാലത്ത് പബ്ലിക് ടെലിഫോൺ ബൂത്തുകൾ ഉണ്ടായിരുന്നതുപോലെയാണ് പുതിയ പദ്ധതി പ്രാവർത്തികമാക്കുക. ഏത് കടയും സ്ഥാപനവും പബ്ലിക് ഡാറ്റാ ഓഫീസാക്കി മാറ്റാനും പി എം വാണി വൈഫൈ ലഭ്യതാ കേന്ദ്രങ്ങളാക്കി ബ്രോഡ്ബാന്റ് കണക്‌ഷനുകൾ ഉപയോക്താക്കൾക്ക് നൽകാനും സാധിക്കും.

source https://www.sirajlive.com/pm-vani-with-low-cost-internet-for-customers.html