കേരള പോലീസ് മുന്‍താരം സി എ ലിസ്റ്റണ്‍ അന്തരിച്ചു

തൃശൂര്‍ | കേരള പോലീസ് ഫുട്ബോള്‍ ടീമിന്റെ മുന്‍കാല താരം സി എ ലിസ്റ്റണ്‍ തൃശൂരില്‍ അന്തരിച്ചു. 54 വയസായിരുന്നു. കേരള പോലീസില്‍ അസിസ്റ്റന്റ് കമാന്‍ഡന്റായിരുന്നു.തൃശൂര്‍ അളഗപ്പ നഗര്‍ സ്വദേശിയായ ലിസ്റ്റന്‍ കേരള പോലീസ് ഫുട്ബോള്‍ ടീമിന്റെ പ്രധാന താരങ്ങളില്‍ ഒരാളായിരുന്നു. ലിസ്റ്റന്റെ ഗോളിലാണ് കേരള പോലീസ് കണ്ണൂര്‍ ഫെഡറേഷന്‍ കപ്പില്‍ ജേതാക്കളായത്. ജൂനിയര്‍ ഇന്ത്യന്‍ ടീമിനുവേണ്ടിയും ബൂട്ടണിഞ്ഞിട്ടുണ്ട്.

അച്ഛന്‍ സി ഡി ആന്റണി ഫുട്‌ബോള്‍ താരമായിരുന്നു. സംസ്ഥാന ചാമ്പ്യന്‍ഷിപ്പില്‍ തൃശൂരിനുവേണ്ടി ബൂട്ടണിഞ്ഞിട്ടുണ്ട്. 1985ല്‍ കാലിക്കറ്റ് യൂണിവേഴ്സിറ്റി ടീമില്‍ അംഗമായി.പിന്നീട് മൂന്ന് വര്‍ഷം അശുതോഷ് മുഖര്‍ജി ട്രോഫി കൈയടക്കിയ കാലിക്കറ്റ് ടീമിന്റെ മുന്‍നിര സ്ട്രൈക്കറായിരുന്നു ലിസ്റ്റന്‍. അങ്ങനെ ഇന്ത്യന്‍ യൂണിവേഴ്സിറ്റി ടീമിലും ഇടം നേടി.

1988ലാണ് ആദ്യമായി കേരളത്തിന്റെ സന്തോഷ് ട്രോഫി ടീമില്‍ അംഗമാകുന്നത്. ലിസ്റ്റന്റെ കൂടി സ്ടൈക്കിങ് മികവിലാണ് അന്ന് കേരള ഫൈനില്‍ പ്രവേശിച്ചത്.

1988ല്‍ കളിക്കൂട്ടകാരന്‍ ഐ എം വിജയന് പിറകെ ലിസ്റ്റനും കേരള പോലീസിലെത്തി. കണ്ണൂര്‍ ഫെഡറേഷന്‍ കപ്പില്‍ മുംബൈ മഹീന്ദ്ര ആന്‍ഡ് മഹീന്ദ്രയെ കേരള പോലീസ് പരാജയപ്പെടുത്തിയത് ലിസ്റ്റന്‍ നേടിയ ഗോളിന്റ മികവിലായിരുന്നു. 1998 വരെ പോലീസ് ടീമിന്റെ പ്രധാന സ്ട്രൈക്കര്‍മാരില്‍ ഒരാളായിരുന്നു.



source http://www.sirajlive.com/2021/03/13/471794.html

Post a Comment

أحدث أقدم