ഇന്ന് ഉച്ചക്ക് മുമ്പായി പാലത്തിന്റെ ഭാരപരിശോധന റിപ്പോര്‍ട്ട് ഡി എം ആര്‍സി സര്‍ക്കാറിന് കൈമാറും. പാലാരിവട്ടം പാലം വര്‍ഷങ്ങളുടെ ദുരിതങ്ങള്‍ക്കൊടുവിലാണ് വീണ്ടും ഗതാഗത്തിന് തയ്യാറായത്. കഴിഞ്ഞ നാല് ദിവസമായി നടക്കുന്ന ഭാരപരിശോധന ഉച്ചയോടെ പൂര്‍ത്തിയാകും. തുടര്‍ന്ന് പരിശോധന റിപ്പോര്‍ട്ട് പൊതുമരാമത്ത് വകുപ്പിനും റോഡ്‌സ് ആന്റ് ബ്രിഡ്ജസ് ഡവലപ്‌മെന്റ് കോര്‍പറേഷനും കൈമാറും. അതിന് ശേഷം ബാക്കിയുള്ളത് അതാവശ്യം മിനുക്ക് പണികള്‍ മാത്രമാണ്. ശനിയാഴ്ച മുതല്‍ എപ്പോള്‍ വേണമെങ്കിലും സര്‍ക്കാറിന് പാലം തുറന്നുകൊടുക്കാമെന്ന് ഡി എം ആര്‍ സി അധികൃതര്‍ അറിയിച്ചു.
പാലം പുനര്‍ നിര്‍മാണത്തിന് കരാര്‍ നല്‍കുമ്പോള്‍ സര്‍ക്കാര്‍ ആവശ്യപ്പെട്ടത് ഒമ്പത് മാസത്തിനുള്ളില്‍ ജോലി തീര്‍ക്കണം എന്നാണ്. എന്നാല്‍ കരാര്‍ ഏറ്റെടുത്ത ഡി എം ആര്‍ സിയും ഊരാളുങ്കല്‍ ലേബര്‍ സൊസൈറ്റിയും ചേര്‍ന്ന് അഞ്ച് മാസവും പത്ത് ദിവസവും കൊണ്ട് നിര്‍മാണം പൂര്‍ത്തിയാക്കി. ഇതും കേരളത്തിന് പുതിയ അനുഭവമായി.
രാഷ്ട്രീയ, ഉദ്യോഗസ്ഥ അഴിമതിയുടെ പ്രതീകമായി മാറിയ പാലാരിവട്ടം പാലം നിയമസഭാ തിരഞ്ഞെടുപ്പിന് മുമ്പ് തുറക്കാന്‍ കഴിയുന്നത് സംസ്ഥാന സര്‍ക്കാറിന് നേട്ടമാകും.
അതിനിടെ പാലം അഴിമതിക്കേസിലെ പ്രതിയായ മുന്‍ മന്ത്രി വി കെ ഇബ്രാഹിംകുഞ്ഞ് വീണ്ടും മത്സരിക്കാന്‍ നീക്കം നടത്തുന്നുണ്ട്. ഇബ്രാഹിം കുഞ്ഞ് മല്‍സരിച്ചാല്‍ ജില്ലയിലെ പല മണ്ഡലങ്ങളിലേയും വിജയസാധ്യതകളെ പ്രതികൂലമായി ബാധിക്കുമെന്നാണ് കോണ്‍ഗ്രസ് ഉള്‍പ്പെടെയുള്ള കക്ഷികളുടെ നിലപാട്.
source http://www.sirajlive.com/2021/03/04/470909.html
إرسال تعليق