ഡെന്‍മാര്‍ക്കിനെ പരാജയപ്പെടുത്തി ഇംഗ്ലണ്ട് ഫൈനലിലേക്ക്

വെംബ്ലി | യൂറോ കപ്പ് സെമി ഫൈനലില്‍ ഡെന്മാര്‍ക്കിനെ പരാജയപ്പെടുത്തി ഇംഗ്ലണ്ട് ഫൈനലിലേക്ക്. എക്‌സ്ട്രാ ടൈം വരെ നീണ്ട മത്സരത്തില്‍ ഒന്നിനെതിരേ രണ്ടുഗോളുകള്‍ക്കാണ് ഇംഗ്ലണ്ട് ഡെന്മാര്‍ക്കിനെ വീഴ്ത്തിയത്.

മത്സരത്തില്‍ ആദ്യം ലീഡെടുത്തത് ഡെന്മാര്‍ക്കായിരുന്നെങ്കിലും പിന്നീട് രണ്ട് ഗോളുകള്‍ തിരിച്ചടിച്ച് ഇംഗ്ലണ്ട് ഫൈനല്‍ ഉറപ്പിക്കുകയായിരുന്നു. നിശ്ചിത സമയത്ത് ഇരുടീമുകളും 1-1 എന്ന സ്‌കോറിന് സമനില വഴങ്ങിയതോടെയാണ് മത്സരം എക്‌സ്ട്രാ ടൈമിലേക്ക് നീങ്ങിയത്. എക്‌സ്ട്രാ ടൈമില്‍ ഇംഗ്ലീഷ് നായകന്‍ ഹാരി കെയ്‌നാണ് ഇംഗ്ലണ്ടിനായി വിജയഗോള്‍ നേടി.

30-ാം മിനിറ്റില്‍ മിക്കേല്‍ ഡംസ്ഗാര്‍ഡ് ആണ് ഡെന്മാര്‍ക്കിനായി ഗോള്‍ കണ്ടെത്തിയത്. 39-ാം മിനിറ്റിലെ സിമോണ്‍ കെയറിന്റെ സെല്‍ഫ് ഗോളിലൂടെയാണ് ഇംഗ്ലണ്ടിന് സമനില ലഭിച്ചത്. 104-ാം മിനിറ്റിലായിരുന്നു ഹാരി കെയ്‌നിന്റെ വിജയഗോള്‍ പിറന്നത്.

ഇതാദ്യമായാണ് ഇംഗ്ലണ്ട് യൂറോ കപ്പിന്റെ ഫൈനലില്‍ പ്രവേശിക്കുന്നത്. .കലാശപ്പോരാട്ടത്തില്‍ ഇറ്റലിയാണ് ഇംഗ്ലണ്ടിന്റെ എതിരാളികള്‍. തിങ്കളാഴ്ച പുലര്‍ച്ചെ 12.30നാണ് ഫൈനല്‍.

source http://www.sirajlive.com/2021/07/08/487788.html