കരിപ്പൂരില്‍ കോടികളുടെ സ്വര്‍ണവുമായി നാല് പേര്‍ പിടിയില്‍

കോഴിക്കോട് |  കരിപ്പൂര്‍ അന്താരാഷ്ട്ര വിമാനത്താവളം വഴി കടത്താന്‍ ശ്രമിച്ച കോടികളുടെ സ്വര്‍ണവുമായി നാല് പേര്‍ പിടിയില്‍ . ഇവരില്‍ നിന്നായി അഞ്ചേമുക്കാല്‍ കിലോഗ്രാം സ്വര്‍ണം കണ്ടെടുത്തു. ഷാര്‍ജയില്‍ നിന്ന് ജി-9456 വിമാനത്തില്‍ വന്ന മലപ്പുറം സ്വദേശി 3.36 കിലോ സ്വര്‍ണ മിശ്രിതം ആണ് ഒളിച്ച് കടത്താന്‍ ശ്രമിച്ചത്. ശരീരത്തില്‍ പലഭാഗങ്ങളിലായി ഒളിപ്പിച്ചും കാലില്‍ സോക്സിന് മുകളില്‍ കെട്ടി വച്ചും ആണ് ഇയാള് സ്വര്‍ണ മിശ്രിതം കടത്താന്‍ ശ്രമിച്ചത്.

ഷാര്‍ജയില്‍ നിന്നും ഇതേ വിമാനത്തില്‍ വന്ന കോഴിക്കോട് സ്വദേശി 501 ഗ്രാം സ്വര്‍ണ മിശ്രിതമാണ് കടത്താന്‍ ശ്രമിച്ചത്. ശരീരത്തിന് ഉള്ളില്‍ ഒളിപ്പിച്ച് കടത്താനാണ് ഇയാള്‍ ശ്രമിച്ചത്.

കണ്ണൂരില്‍ നിന്നുള്ള കസ്റ്റംസ് ഉദ്യോഗസ്ഥര്‍ നല്‍കിയ വിവരപ്രകാരം ആണ് ഇയാളെ പിടികൂടിയത്. ഷാര്‍ജയില്‍ നിന്നുള്ള ഐ എക്‌സ് 354 വിമാനത്തില്‍ വന്ന കാസര്‍കോട് സ്വദേശി 1069 ഗ്രാം സ്വര്‍ണ മിശ്രിതം ആണ് ശരീരത്തിന് ഉള്ളില്‍ ഒളിപ്പിച്ച് കടത്താന്‍ ശ്രമിച്ചത്.ഇതേ വിമാനത്തില്‍ വന്ന മലപ്പുറം കരേക്കോട് സ്വദേശിയില്‍നിന്നും 854 ഗ്രാം സ്വര്‍ണ മിശ്രിതവും കസ്റ്റംസ് പിടികൂടി.

source https://www.sirajlive.com/four-arrested-with-gold-worth-crores-in-karipur.html