തിരുവനന്തപുരം | തീവ്രമായ മഴയെത്തുടര്ന്നുണ്ടായ പ്രളയവും ഉരുള് പൊട്ടലും കാരണം കേരളത്തിന്റെ വിവിധ ഭാഗങ്ങളില് വലിയ നാശനഷ്ടങ്ങളാണ് ഉണ്ടായിട്ടുള്ളതെന്ന് കെ എസ് ഇ ബി. വൈദ്യുതി വിതരണ സംവിധാനത്തിന് സംസ്ഥാനത്തുടനീളം കനത്ത തകരാറുകളുണ്ടായിട്ടുണ്ട്. വെള്ളം കയറിയതിനെത്തുടര്ന്ന് സുരക്ഷാ ഭീഷണിയുള്ളതിനാല് നിരവധി ലൈനുകളും ട്രാന്സ്ഫോര്മറുകളും ഓഫ് ചെയ്ത് വയ്ക്കേണ്ട സ്ഥിതിയാണെന്നും കെ എസ് ഇ ബി അറിയിച്ചു.
പൊന്കുന്നം ഡിവിഷനു കീഴില് വരുന്ന കാഞ്ഞിരപ്പള്ളി, പാറത്തോട്, മുണ്ടക്കയം, കൂട്ടിക്കല്, എരുമേലി പ്രദേശങ്ങളിലെ മിക്കവാറും എല്ലാ 11 കെ വി ഫീഡറുകളും തകരാറിലാണ്. മുണ്ടക്കയം ടൗണിലുണ്ടായ വെള്ളപ്പൊക്കത്തില് സെക്ഷന് ഓഫീസും അകപ്പെട്ടിരിക്കുന്നു.
പാല ഡിവിഷന്റെ കീഴിലും വലിയ നാശനഷ്ടങ്ങളുണ്ടായിട്ടുണ്ട്. പ്രളയത്തെത്തുടര്ന്ന് ഈരാറ്റുപേട്ട, തീക്കൊയി, പൂഞ്ഞാര് മേഖലകളിലെ എല്ലാ 11 കെ വി ഫീഡറുകളും ഓഫ് ചെയ്ത അവസ്ഥയിലാണ്. 33 കെ വി പൈക ഫീഡര് തകരാറിലായതോടെ പൈക സെക്ഷന്റെ പ്രവര്ത്തനവും അവതാളത്തിലായി.
കൊല്ലം ജില്ലയിലെ തെന്മല സെക്ഷന് പ്രദേശത്ത് തീവ്ര മഴയെത്തുടര്ന്ന് പുഴയുടെ തീരത്തുള്ള കെട്ട് ഇടിഞ്ഞ് 3 ഹൈടെന്ഷന് പോസ്റ്റുകളും 4 ലോ ടെന്ഷന് പോസ്റ്റുകളും വെള്ളത്തില് ഒലിച്ചുപോയി. നിരവധി സ്ഥലങ്ങളില് ലൈനില് മരം വീണു .കോട്ടവാസല് അച്ചന്കോവില് 11 കെ വി ഫീഡറുകള് തകരാറിലാണ് ആണ്. 35 ഓളം ട്രാന്സ്ഫോര്മറുകള് ഓഫാണ്.
കുഴല്മന്ദം പുല്ലുപ്പാറ ഭാഗത്ത് ഹൈടെന്ഷന് ഫീഡറില് വലിയ മരം വീണ് ഡബിള് പോള് സ്ട്രക്ചറും 2 ഹൈടെന്ഷന് പോസ്റ്റും തകര്ന്നതിനാല് നാല് ട്രാന്സ്ഫോര്മറില് വരുന്ന 300 ഓളം ഉപഭോക്താക്കള്ക്ക് വൈദ്യുതി മുടങ്ങുന്ന സാഹചര്യമാണ്.
മണിമല സെക്ഷന് പരിധിയില് 2018 നെക്കാളും വളരെ ഉയര്ന്ന നിരക്കിലാണ് മണിമലയാറ്റില് വെള്ളം ഉയര്ന്നിരിക്കുന്നത്. അപകടസാധ്യത കണക്കാക്കി 60 ഓളം ട്രാന്സ്ഫോര്മറുകള് ഓഫ് ചെയ്തിട്ടുണ്ട്. ഏകദേശം 8000 ഉപഭോക്താക്കള്ക്ക് വൈദ്യുതി ഇല്ല. ഒന്പതോളം 11 കെ വി പോസ്റ്റുകളും കടപുഴകിയിട്ടുണ്ട്. സംസ്ഥാനത്തിന്റെ ഇതരഭാഗങ്ങളിലെ അവസ്ഥയും വ്യത്യസ്തമല്ലെന്നും കെ എസ് ഇ ബി അറിയിച്ചു.
കെ എസ് ഇ ബിയുടെ വൈദ്യുതി സേന പൂര്ണ്ണ തോതില്ത്തന്നെ ഈ വൈകിയ വേളയിലും രംഗത്തുണ്ടെന്നും ഉപഭോക്താക്കളുടെ സഹകരണം അഭ്യര്ത്ഥിക്കുന്നുവെന്നും അധികൃതര് അറിയിച്ചു.
source https://www.sirajlive.com/severe-malfunctions-in-the-power-supply-kseb-requests-customer-cooperation.html
إرسال تعليق