ചെറുവാടി ബ്രിട്ടീഷ് വിരുദ്ധ പോരാട്ടത്തിന് ഒരു നൂറ്റാണ്ട്

മുക്കം | ചെറുവാടിയിലെ ബ്രിട്ടീഷ് വിരുദ്ധ പോരാട്ടം നൂറ് വർഷം തികയുന്ന ഓർമയിൽ ചെറുവാടി മഹല്ല് പുതിയോത്ത് ജുമുഅ മസ്ജിദിന് കീഴിൽ ഒരു വർഷം നീണ്ടുനിൽക്കുന്ന സ്മൃതി ശതാബ്‌ദിക്ക് ഇന്ന് തുടക്കമാകുമെന്ന് മഹല്ല് ഭാരവാഹികൾ മുക്കത്ത് വാർത്താസമ്മേളനത്തിൽ പറഞ്ഞു.

ഒരു നൂറ്റാണ്ടിന്റെ സ്മാരകമായി ലൈബ്രറിയും ഓഡിറ്റോറിയവും ഉൾക്കൊള്ളുന്ന സ്മാരക സാംസ്‌കാരിക നിലയത്തിന്റെ തറക്കല്ലിടൽ കർമം ഇന്ന് ജുമുഅ നിസ്‌കാരത്തിന് ശേഷം ചെറുവാടി മഹല്ല് ഖാസി ഡോ. എം അബ്ദുൽ അസീസ് ഫൈസി നിർവഹിക്കും. തുടർന്നു നടക്കുന്ന ദേശീയോഗ്രഥന പ്രതിജ്ഞയോടെ സ്മൃതി ആചരണത്തിന് തുടക്കമാകും.
രക്തസാക്ഷികളുടെ ഖബറിടം ചരിത്ര സ്മാരകമായി സംരക്ഷിക്കുന്ന പ്രവൃത്തികൾ നടന്നു വരുന്നതായി ഭാരവാഹികൾ പറഞ്ഞു.

അറുപതിൽപ്പരം ആളുകൾ കൊല്ലപ്പെട്ടതിനു ശേഷം രക്തസാക്ഷികളുടെ ഭൗതിക ശരീരം കൊണ്ടുപോയി ചരിത്രം മായ്ച്ചുകളയാൻ ബ്രിട്ടീഷ് പട്ടാളം ശ്രമിച്ചതായി പഠനങ്ങൾ പുറത്തുവന്ന സ്ഥിതിക്ക് ഈ ചരിത്ര സ്മാരകങ്ങൾ നിലനിർത്തേണ്ടത് അനിവാര്യമായി കണക്കാക്കുന്നു.
മൃതശരീരങ്ങൾ കൊണ്ടുപോകാൻ നവംബർ 13ന് രാവിലെ തന്നെ നിരവധി യന്ത്രബോട്ടുകൾ ക്യാപ്റ്റൻ നൈറ്റിന്റെ നേതൃത്വത്തിൽ ഫറോക്കിൽ ഒരുങ്ങിയതായി ബ്രിട്ടീഷ് പോലീസ് രേഖകളിൽ ഉണ്ട്. എന്നാൽ അക്കാലത്തെ ചെറുവാടിക്കാരായ യുവാക്കൾ പട്ടാളം തിരിച്ചുവരും മുമ്പ് ധൃതിപ്പെട്ട് മൃതദേഹങ്ങൾ സംസ്‌കരിക്കുകയായിരുന്നു. അതുകൊണ്ട് കൂടിയാണ് അവരെ അടക്കം ചെയ്ത സ്ഥലം പ്രത്യേകം ചരിത്ര സ്മാരകമാക്കുന്നതെന്നും ഭാരവാഹികൾ കൂട്ടിച്ചേർത്തു. ശതാബ്‌ദിയുടെ ഭാഗമായി ചെറുവാടിയുടെ പ്രാദേശിക ചരിത്ര സ്മരണിക പ്രസിദ്ധീകരിക്കും. കേരളത്തിലെ പ്രമുഖരായ ചരിത്രകാരന്മാരെ പങ്കെടുപ്പിച്ചുകൊണ്ട് ചരിത്ര സെമിനാർ സംഘടിപ്പിക്കുകയും ചെയ്യും.

ചെറുവാടി പുതിയോത്ത് മഹല്ല് കമ്മിറ്റിയുടെ കീഴിൽ നടക്കുന്ന സ്മൃതി ആചരണങ്ങൾക്കായി ഖാസി ഡോ. എം അബ്ദുൽ അസീസ് ഫൈസി മുഖ്യ രക്ഷാധികാരിയും വി ഉണ്ണിമാമു ചെയർമാനും വി അബ്ദുല്ല മാസ്റ്റർ കൺവീനറുമായി 101 അംഗ സ്വാഗതസംഘം രൂപവത്കരിച്ചിട്ടുണ്ട്. വാർത്താ സമ്മേളനത്തിൽ ഖാസി ഡോ. എം അബ്ദുൽ അസീസ് ഫൈസി, മഹല്ല് പ്രസിഡന്റ്് വി ഉണ്ണിമാമു മാസ്റ്റർ, സെക്രട്ടറി വി അബ്ദുല്ല മാസ്റ്റർ, സ്മരണിക കമ്മിറ്റി ചെയർമാൻ പി ജി മുഹമ്മദ്, കൺവീനർ കെ പി അബ്ദുർറഹ്‌മാൻ പങ്കെടുത്തു.

 

അധിനിവേശത്തിനെതിരെ അധികാരം വലിച്ചെറിഞ്ഞ പോരാട്ടം

മുക്കം | 1921ലെ ബ്രിട്ടീഷ് വിരുദ്ധ പോരാട്ടത്തിന്റെ മലബാറിലെ പ്രധാന കേന്ദ്രമായ ചെറുവാടി യുദ്ധത്തിന് ഇന്ന് ഒരു നൂറ്റാണ്ട് തികയുന്നു.

1921 നവംബർ 12ന് ശനിയാഴ്ച ചെറുവാടി പള്ളിയങ്കണത്തിൽ വെച്ച് ബ്രിട്ടീഷ് പട്ടാളവുമായി നേരിട്ട് നടന്ന പോരാട്ടത്തിൽ 60ൽപ്പരം ആളുകളാണ് രക്തസാക്ഷികളായത്.
കൊടിയത്തൂർ അംശം അധികാരിയായിരുന്ന കട്ടയാട്ട് ഉണ്ണിമൊയ്തീൻ കുട്ടി അധികാരി സ്ഥാനം ഉപേക്ഷിച്ച് വില്ലേജ് രേഖകൾ ചുട്ടുകരിച്ചാണ് സൈന്യവുമായുള്ള ഏറ്റുമുട്ടലിന് നേതൃത്വം നൽകിയത്.

“ബ്രിട്ടീഷ് സർക്കാറിനെതിരെ മരണംവരെ പോരാടണം, അവർക്ക് പാദസേവ ചെയ്യുന്ന ജന്മിമാർ നാടിന് അപമാനമാണ്, അവരോട് സന്ധി ചെയ്യാൻ പാടില്ല’ എന്നീ മുദ്രവാക്യങ്ങളുയർത്തിയായിരുന്നു മാപ്പിളമാരുടെ പോരാട്ടം. ബ്രിട്ടീഷ് സൈന്യം പാവപ്പെട്ട ജനങ്ങളെയടക്കം കൊന്നൊടുക്കുകയും പള്ളികളും വീടുകളും തീവെച്ച് നശിപ്പിച്ച് നാട്ടിൽ സംഹാര താണ്ഡവമാടുകയും ചെയ്തപ്പോഴാണ് ഉണ്ണിമൊയ്തീൻ കുട്ടി അധികാരി ബ്രിട്ടീഷ് ഉദ്യോഗം വലിച്ചെറിഞ്ഞ് ഖിലാഫത്ത് പോരാട്ടത്തിനിറങ്ങിയത്.
അദ്ദേഹത്തിന്റെ നേതൃത്വത്തിൽ നവംബർ 11ന് സായാഹ്‌നത്തിൽ ചെറുവാടി പാറപ്പുറത്തെ സ്‌കൂൾ മുറ്റത്ത് 700ൽപ്പരം ആളുകളാണ് തടിച്ചുകൂടിയത്.

അധികാരി പ്രസിഡന്റായി ഒരു ഖിലാഫത്ത് കോൺഗ്രസ്സ് കമ്മിറ്റി രൂപവത്കരിച്ചു. അവിടെ വെച്ച് തന്റെ അധികാരിപ്പണി ചാലിയാർ പുഴയിൽ വലിച്ചെറിയുന്നു എന്നും പ്രഖ്യാപിച്ചു.
അന്ന് രാത്രി തന്റെ തറവാട്ടിൽ മൗലിദ് പരിപാടി നടത്തി നാട്ടുകാർക്കെല്ലാം ഭക്ഷണം വിതരണം ചെയ്തു. പിറ്റേന്ന് പ്രഭാതത്തിൽ വെള്ളക്കാരോട് ഒരു വിട്ടുവീഴ്ചയുമില്ല എന്ന് പ്രഖ്യാപിച്ച് യുദ്ധത്തിനിറങ്ങി.

രാവിലെ ഒമ്പതിന് 300ൽപ്പരം ആളുകൾ ചെറുവാടി പള്ളിയിൽ തടിച്ചുകൂടി. തലേന്ന് രാത്രിയിൽ തന്നെ കുന്ദമംഗലത്ത് നിന്ന് മുക്കം വഴി വലിയൊരു സൈന്യം ചെറുവാടി ലക്ഷ്യംവെച്ചു പുറപ്പെട്ടിരുന്നു.
അവർ 12ന് രാവിലെ ചാലിയാർ പുഴയിൽ ചെറുവാടിക്കും വാഴയൂരിനും മധ്യേ ക്യാമ്പ് ചെയ്തു. ജെ ഇല്യോട്ടിന്റെയും ഖാൻ ബഹദൂർ ആമു സാഹിബിന്റെയും നേതൃത്വത്തിൽ ഗൂർഖകളും ഏഴ് പ്ലാറ്റൂൺ ബർമ റൈഫിൾസുമുണ്ട്. കൂടാതെ രണ്ട് കമ്പനി വീതം മലബാർ സ്പെഷ്യൽ പോലീസും അവർക്ക് ചുറ്റുമുണ്ട്. അവർ ചെറുവാടി വലയം ചെയ്യും വിധം കോപ്പുകൂട്ടി.

ചെറുവാടിയിൽ അധികാരിയും കോൽക്കാരനും ഖിലാഫത്ത് പ്രസ്ഥാനത്തിൽ ചേർന്ന് പടയൊരുങ്ങുന്ന വിവരം നവംബർ അഞ്ചിന് മുമ്പുതന്നെ ബ്രിട്ടീഷ് സൈന്യത്തിന് ലഭിച്ചിരുന്നു.
സൈന്യം പള്ളി ലക്ഷ്യംവെച്ച് പുറപ്പെടുകയും ഘോര യുദ്ധം നടക്കുകയും ചെയ്തു. അധികാരി ഉൾപ്പെടെ 59 പേർ മരിച്ചു എന്നാണ് ബ്രിട്ടീഷ് രേഖകളിലുള്ളത്. എന്നാൽ 64 പേർ മരിച്ചിട്ടുണ്ടെന്നാണ് നാട്ടുകാരുടെ കണക്ക്.

source https://www.sirajlive.com/a-century-of-anti-british-struggle.html