പാക്കിസ്ഥാന് ചൈന പുതിയ യുദ്ധക്കപ്പല്‍ നല്‍കിയ വാര്‍ത്ത ഇന്ത്യന്‍ പ്രതിരോധ മേഖല ആശങ്കയോടെയാണ് കേട്ടത്. തിങ്കളാഴ്ച ഷാംഗ്ഹായില്‍ നടന്ന ചടങ്ങിലാണ് ചൈനീസ് സ്റ്റേറ്റ് ഷിപ്പ് ബില്‍ഡിംഗ് കോര്‍പറേഷന്‍ നിര്‍മിച്ച അത്യന്താധുനികവും വലുപ്പമേറിയതുമായ 054എ/പി ടൈപ് യുദ്ധക്കപ്പല്‍ പാക്കിസ്ഥാനു കൈമാറിയത്. ഉപരിതലത്തില്‍ നിന്ന് ഉപരിതലത്തിലേക്കും വായുവിലേക്കും വെള്ളത്തിലേക്കും ആക്രമണം നടത്താന്‍ കെല്‍പ്പുള്ളതാണ് ഇലക്ട്രിക് വാര്‍ഫെയര്‍ സംവിധാനമുള്ള ഈ പടക്കപ്പല്‍. ചൈന ഇതുവരെ കയറ്റുമതി ചെയ്തിട്ടുള്ളതില്‍ വെച്ച് ഏറ്റവും അത്യാധുനികമായ യുദ്ധക്കപ്പലാണിത്. ഇന്ത്യന്‍ അതിര്‍ത്തികളില്‍ കൈയേറ്റ ശ്രമവും പ്രകോപനവും നടത്തുന്ന ചൈന ഇന്ത്യന്‍ മഹാസമുദ്രത്തിലെ അധീശത്വം ലക്ഷ്യമിട്ടാണ് പാക്കിസ്ഥാന്റെ നാവികശേഷി പതിന്മടങ്ങ് മെച്ചപ്പെടുത്തുന്ന ഈയൊരു ഇടപാടിന് മുതിര്‍ന്നതെന്നാണ് നിരീക്ഷിക്കപ്പെടുന്നത്. ഭാവിയില്‍ മൂന്ന് യുദ്ധക്കപ്പലുകള്‍ കൂടി ചൈന പാക്കിസ്ഥാന് കൈമാറും. ഇന്ത്യന്‍ മഹാസമുദ്രത്തിലെ സായുധ ശക്തിയുടെ തുല്യത നിലനിര്‍ത്താനും മേഖലയില്‍ പാക്കിസ്ഥാനുള്ള വെല്ലുവിളികള്‍ നേരിടാനും കപ്പല്‍ കൈമാറ്റം സഹായിക്കുമെന്ന് ചൈനയിലെ പാക്കിസ്ഥാന് സ്ഥാനപതി മഈനുല്‍ ഹഖ് പറയുന്നു. കശ്മീര്‍ പ്രശ്നം രൂക്ഷമായ വേളയില്‍ ഈ പാക്-ചൈന ഇടപാട് ഇന്ത്യക്ക് കടുത്ത ഭീഷണിയാണ്.
ഇന്ത്യന്‍ മഹാസമുദ്രത്തില്‍ ആധിപത്യം നേടാനും ഇന്ത്യയെ പ്രതിരോധിക്കുന്നതിനും പാക്കിസ്ഥാനുമായുള്ള സൈനിക സഹകരണം വര്‍ധിപ്പിച്ചു വരികയാണ് ചൈന. യുദ്ധക്കപ്പല്‍ കൈമാറ്റത്തിനു പുറമെ തോക്കുകള്‍ ഘടിപ്പിച്ച അത്യാധുനിക സംവിധാനങ്ങളുള്ള ട്രക്കുകള്‍, മസില്‍ വെലോസിറ്റി റഡാറുകള്‍ തുടങ്ങിയ യുദ്ധോപകരണങ്ങള്‍ കൈമാറാനുള്ള ചര്‍ച്ചകളും ഇരു രാഷ്ട്രങ്ങളും തമ്മില്‍ നടന്നു വരുന്നുണ്ട്. പാക്കിസ്ഥാന്റെ മിസൈല്‍ ഗവേഷണ പദ്ധതികള്‍ക്ക് ധനസഹായം നല്‍കുന്നുമുണ്ട് വര്‍ഷങ്ങളായി പാക്കിസ്ഥാന്റെ പ്രധാന പ്രതിരോധ പങ്കാളിയായി മാറിയ ചൈന. ഇന്ത്യയുടെ അതിര്‍ത്തി പ്രദേശങ്ങളില്‍ ചൈനയും പാക്കിസ്ഥാനും സംയുക്തമായി സൈനിക നീക്കങ്ങള്‍ നടത്തി വരികയും ചെയ്യുന്നുണ്ട്.
ഇന്ത്യന്‍ മഹാസമുദ്രത്തില്‍ ചൈനക്ക് സാമ്പത്തികവും സൈനികവുമായ പ്രത്യേക താത്പര്യങ്ങളുണ്ട്. ചൈനയുടെ ചരക്കുനീക്കത്തിന്റെ വലിയൊരു പങ്കും ലോക സമുദ്ര വ്യാപാരത്തിന്റെ 25 ശതമാനവും ഇന്ത്യയുടെ ചരക്കുനീക്കത്തിന്റെ 40 ശതമാനവും കടന്നുപോകുന്നതും ആഫ്രിക്ക, ഗള്‍ഫ് രാജ്യങ്ങള്‍ എന്നിവിടങ്ങളില്‍ നിന്നുള്ള ഇന്ധന ഇറക്കുമതിയും മലാക്ക കടലിടുക്ക് വഴിയാണ്. ഇന്ത്യയുടെ സംയുക്ത സൈനിക താവളമായ ആന്‍ഡമാന്‍ നിക്കോബാര്‍ ദ്വീപ് സമൂഹത്തില്‍ നിന്ന് ഏറെ ദൂരത്തിലല്ല മലാക്ക. ചൈനയെ ഇത് വിഷമത്തിലാക്കുന്നു. ഇടക്കിടെ പൊട്ടിപ്പുറപ്പെടുന്ന ഇന്ത്യ-ചൈന അതിര്‍ത്തി തര്‍ക്കം ഏറ്റുമുട്ടലിലേക്കു നീങ്ങുകയാണെങ്കില്‍ നാവിക ഉപരോധം ഏര്‍പ്പെടുത്താനും ചൈനയുടെ ചരക്കുനീക്കം തടയാനും ഇന്ത്യക്കു സാധിക്കും. ബീജിംഗിന് അത് കനത്ത സാമ്പത്തിക നഷ്ടം വരുത്തുകയും ചൈനയില്‍ ഇന്ധന പ്രതിസന്ധിക്ക് ഇത് ഇടവരുത്തുകയും ചെയ്യും. ഈ സാഹചര്യം മറികടക്കാനായി തായ്്‌ലാന്‍ഡുമായി സഹകരിച്ച് പുതിയൊരു കനാല്‍ നിര്‍മിക്കാനുള്ള തയ്യാറെടുപ്പിലാണ് ചൈനയെന്നാണ് റിപ്പോര്‍ട്ട്. ഇന്ത്യന്‍ മഹാസമുദ്രത്തില്‍ സാന്നിധ്യം ശക്തിപ്പെടുത്താനുള്ള പദ്ധതികളുമായി ചൈനീസ് സര്‍ക്കാര്‍ മുന്നോട്ട് പോകുന്നതായി ചൈനീസ് മാധ്യമങ്ങള്‍ വെളിപ്പെടുത്തുകയും ചെയ്തിരുന്നു. ആഫ്രിക്കന്‍ രാജ്യമായ ജിബൂട്ടിയില്‍ 2017ല്‍ ചൈന നാവിക താവളം നിര്‍മിച്ചതും ശ്രീലങ്കയിലെ ഹംബന്‍തോട്ട തുറമുഖത്തിന്റെ നടത്തിപ്പിനുള്ള അവകാശം 99 വര്‍ഷത്തേക്ക് ബീജിംഗ് സ്വന്തമാക്കിയതുമെല്ലാം ഇന്ത്യന്‍ മഹാസമുദ്രത്തിലെ ആധിപത്യം മുന്നില്‍ കണ്ടാണ്. മാലദ്വീപ് സര്‍ക്കാറുമായുള്ള സഹകരണം ചൈന വര്‍ധിപ്പിക്കുന്നതും ഈ ലക്ഷ്യം വെച്ചാണ്. മാലദ്വീപില്‍ വാണിജ്യ പോസ്റ്റുകള്‍ ആരംഭിക്കുന്നതിന് മാലദ്വീപ് സര്‍ക്കാറുമായി ഇതിനിടെ ചൈന കരാറിലേര്‍പ്പെട്ടിരുന്നു. വാണിജ്യ പോസ്റ്റുകളെ ഭാവിയില്‍ സൈനിക ആവശ്യങ്ങള്‍ക്കായി പ്രയോജനപ്പെടുത്താനാണ് ചൈനയുടെ ലാക്കെന്നാണ് വിലയിരുത്തപ്പെടുന്നത്. മാലിയിലെ ഫെയ്ദു ഫിനോള്‍ഹു ദ്വീപ് 2066 വരെ പാട്ടത്തിനെടുത്തിട്ടുമുണ്ട് ചൈന.
മോദി ഭരണത്തില്‍ ഇന്ത്യ – യു എസ് ബന്ധം കൂടുതല്‍ ശക്തമാകുകയും ഇന്തോ-പസഫിക് മേഖലയില്‍ ഇന്ത്യയുമായുള്ള തന്ത്രപരമായ കൂട്ടുകെട്ട് തുടരുമെന്ന് അമേരിക്ക വ്യക്തമാക്കുകയും ചെയ്ത സാഹചര്യത്തിലാണ് ഇന്ത്യന്‍ മഹാസമുദ്രത്തിലെ ആധിപത്യത്തിനുള്ള നീക്കം ചൈന ശക്തമാക്കിയത്. ഇന്ത്യ- അമേരിക്ക സൈനിക ബന്ധത്തെ ചൈന രൂക്ഷമായി അപലപിക്കുകയും ഏഷ്യന്‍ രാജ്യങ്ങളുടെ സന്തുലനം അത് താറുമാറിലാക്കുമെന്ന് ആശങ്ക പ്രകടിപ്പിക്കുകയും ചെയ്തിരുന്നു. ചൈനയുടെ ഈ നീക്കം മുന്നില്‍ കണ്ട് ഇന്ത്യ ശക്തമായ പ്രതിരോധ മാര്‍ഗങ്ങള്‍ സ്വീകരിച്ചു വരുന്നുമുണ്ട്. ഇന്ത്യന്‍ മഹാസമുദ്രത്തില്‍ ചൈനീസ് സാന്നിധ്യം വര്‍ധിക്കുന്നതായും പീപ്പിള്‍ ലിബറേഷന്‍ ആര്‍മിയുടെ നേവല്‍ വിഭാഗം 1985 മുതല്‍ കൃത്യമായ ഇടവേളകളില്‍ ഇന്ത്യന്‍ മഹാസമുദ്രത്തില്‍ സൈനിക വിന്യാസവും പട്രോളിംഗും നടത്തുന്നതായും ഇന്ത്യന്‍ നാവിക സേനാ തലവന്‍ കരംബീര്‍ സിംഗ് ഇതിനിടെ വെളിപ്പെടുത്തിയിരുന്നു. ഇത് തിരിച്ചറിഞ്ഞതായും അദ്ദേഹം അറിയിച്ചു. അടുത്തിടെ 24 എം എച്ച് 60 റോമിയോ സീഹോക്ക് മുങ്ങിക്കപ്പല്‍വേധ ഹെലികോപ്ടറുകള്‍ക്കുള്ള ഇടപാടില്‍ അമേരിക്കയുമായി ഇന്ത്യ കരാറിലേര്‍പ്പെട്ടത് ഈ ലക്ഷ്യത്തിലാണ്. 2019 ഏപ്രിലിലാണ് ഇതുസംബന്ധിച്ച കരാറില്‍ യു എസുമായി മോദി സര്‍ക്കാര്‍ ഒപ്പുവെച്ചത്. അന്തര്‍വാഹിനികളെ വേട്ടയാടാനും യുദ്ധക്കപ്പലുകള്‍ക്കു നേരേ ആക്രമണം നടത്താനും കടലില്‍ തിരച്ചിലും രക്ഷാപ്രവര്‍ത്തനങ്ങളും നടത്താനും പാകത്തില്‍ രൂപകല്‍പ്പന ചെയ്ത എം എച്ച് 60 സീഹോക്ക് ഹെലികോപ്ടറുകള്‍ ലോകത്തെ ഏറ്റവും ആധുനിക കോപ്ടറുകളിലൊന്നാണ്. ആണവ ശേഷിയുള്ള ഐ എന്‍ എസ് ചക്ര ഉള്‍പ്പെടെ പതിനഞ്ചോളം വരുന്ന അന്തര്‍ വാഹിനികളുണ്ട് ഇന്ത്യയുടെ വശം.
source https://www.sirajlive.com/china-pakistan-warship-deal-a-threat-to-india.html
إرسال تعليق