ജയ്പുര്‍| പിങ്ക് നിറമുള്ള പുള്ളിപ്പുലിയാണ് താരം. പിങ്ക് നിറത്തിലുള്ള പുള്ളിപ്പുലിയെ ഇന്ത്യയില്‍ നിങ്ങളാരും തന്നെ കാണാന്‍ സാധ്യതയില്ല. എന്നാല്‍ ഇപ്പോള്‍ തെക്കന്‍ രാജസ്ഥാനിലെ ആരവല്ലി മലനിരകളിലെ രണക്പൂര്‍ മേഖലയില്‍ ഒരു പിങ്ക് പുള്ളിപ്പുലിയെ കണ്ടു എന്നാണ് ടൈംസ് ഓഫ് ഇന്ത്യ റിപ്പോര്‍ട്ട് ചെയ്യുന്നത്. രണക്പൂരിലെയും കുംഭല്‍ഗഡിലെയും പ്രദേശവാസികള്‍ സ്‌ട്രോബെറി നിറമുള്ള പുള്ളിപ്പുലിയെ ഇടയ്ക്കിടെ കണ്ടതായാണ് അവകാശപ്പെടുന്നത്. അടുത്തിടെയാണ് പുള്ളിപ്പുലിയെ കാമറയില്‍ പകര്‍ത്താന്‍ സാധിച്ചത്.
സ്‌ട്രോബെറി പുള്ളിപ്പുലി അതിന്റെ ശരീരം കാരണം വ്യത്യസ്ത ഇനമാണെന്നാണ് സുവോളജിസ്റ്റുകളുടെ അഭിപ്രായം. ഉദയ്പൂര്‍ ആസ്ഥാനമായുള്ള വൈല്‍ഡ് ലൈഫ് കണ്‍സര്‍വേറ്ററും ഫോട്ടോഗ്രാഫറുമായ ഹിതേഷ് മോട്വാനിയാണ് നാല് ദിവസത്തെ തിരച്ചിലിന് ശേഷം പുള്ളിപ്പുലിയുടെ ചിത്രങ്ങള്‍ പകര്‍ത്തിയതെന്നാണ് റിപ്പോര്‍ട്ടുകള്‍. പുള്ളിപ്പുലിക്ക് അഞ്ചോ ആറോ വയസ്സ് പ്രായമുണ്ടാകുമെന്ന് ഹിതേഷ് പറഞ്ഞു.
2016, 2019 വര്‍ഷങ്ങളില്‍ ദക്ഷിണാഫ്രിക്കയില്‍ പിങ്ക് നിറത്തിലുള്ള പുള്ളിപ്പുലിയെ കണ്ടിരുന്നതായി റിപ്പോര്‍ട്ടുകളുണ്ട്. 2019ല്‍ ഈ അപൂര്‍വ ഇനം പുള്ളിപ്പുലിയെ ഒരു ദമ്പതികള്‍ കാമറയില്‍ പകര്‍ത്തിയിരുന്നു. ദക്ഷിണാഫ്രിക്കയിലെ താബ തോലോ വൈല്‍ഡര്‍നെസ് റിസര്‍വിലെ മരത്തില്‍ പിന്‍ ചെയ്ത കാമറയാണ് സ്‌ട്രോബെറി പുള്ളിപ്പുലിയെ പകര്‍ത്തിയിരുന്നത്. റിസര്‍വ് ഉടമ അലന്‍ വാട്സണും ഭാര്യ ലിന്‍സിയുമാണ് ലോകത്തിലെ ഏറ്റവും അപൂര്‍വമായ ഈ പുള്ളിപ്പുലിയെ പകര്‍ത്തിയത്. ഇത്തരം പുള്ളിപ്പുലികള്‍ വളരെ നന്നായി മറഞ്ഞിരിക്കുന്നവയാണെന്നാണ് അലന്റെ അഭിപ്രായം. പൊക്കമുള്ള പുല്ലിന്‍ നടുവിലൂടെ പോകുകയാണെങ്കില്‍ അവയെ ആര്‍ക്കും കാണാന്‍ സാധിക്കുകയില്ലെന്നും അലന്‍ കൂട്ടിച്ചേര്‍ത്തു.
ഗോള്‍ഡന്‍ പുള്ളിപ്പുലി എന്നാണ് സ്‌ട്രോബെറി പുള്ളിപ്പുലിയുടെ മറ്റൊരു പേര്. ഈ അപൂര്‍വമായ ഇനത്തെ 2012ല്‍ ബോട്‌സ്വാന അതിര്‍ത്തിയോട് ചേര്‍ന്നുള്ള മറ്റൊരു സ്ഥലത്ത് മാത്രമാണ് ഔദ്യോഗികമായി കണ്ടെത്തിയതായി രേഖപ്പെടുത്തപ്പെട്ടിട്ടുള്ളത്. എറിത്രിസം എന്ന ജനിതകമാറ്റം കാരണമാണ് ഇവയ്ക്ക് പിങ്ക് നിറമായിരിക്കുന്നതെന്നാണ് വിദഗ്ധരുടെ അഭിപ്രായം.
source https://www.sirajlive.com/the-world-39-s-rarest-strawberry-leopard-in-india.html
إرسال تعليق