ധോണി ധമാക്ക; ആവേശപ്പോരില്‍ മുംബൈയെ കീഴടക്കി ചെന്നൈ

മുംബൈ | പ്രായത്തിനൊന്നും തന്നെ തെല്ലും തളര്‍ത്താനായില്ലെന്ന് തെളിയിച്ച് അവസാന പന്തുകളില്‍ മഹേന്ദ്ര സിംഗ് ധോണി തകര്‍ത്താടിയപ്പോള്‍ ചെന്നൈ സൂപ്പര്‍ കിംഗ്‌സിന് മൂന്ന് വിക്കറ്റ് ജയം. ആവേശം കത്തിക്കയറിയ പോരാട്ടത്തില്‍ മുംബൈ ഇന്ത്യന്‍സിനെയാണ് തോല്‍പ്പിച്ചത്. തോല്‍ക്കാന്‍ സാധ്യതയുണ്ടായിരുന്ന മത്സരമാണ് തന്റെ പ്രതാപത്തിന് ഒരു മങ്ങലുമേറ്റിട്ടില്ലെന്ന പ്രകടനത്തിലൂടെ ധോണി ടീമിന് അനുകൂലമാക്കി മാറ്റിയത്. അന്തിമ ഓവറുകളില്‍ രംഗത്തെത്തിയ താരം 13 പന്തുകളില്‍ നിന്ന് 28 റണ്‍സാണ് അടിച്ചെടുത്തത്. അവസാന പന്ത് ബൗണ്ടറി കടത്തിയാണ് ചെന്നൈ മുന്‍ നായകന്‍ ടീമിന് വിജയമൊരുക്കിയത്. സ്‌കോര്‍: മുംബൈ ഇന്ത്യന്‍സ്- 155/7. ചെന്നൈ സൂപ്പര്‍ കിംഗ്‌സ്- 156/7.

ചെന്നൈക്കു വേണ്ടി അമ്പാട്ടി റായിഡു (35ല്‍ 40), റോബിന്‍ ഉത്തപ്പ (25ല്‍ 30) എന്നിവരും മികച്ച പ്രകടനം കാഴ്ചവച്ചു. നേരത്തെ, ചെന്നൈയുടെ കിടയറ്റ ബൗളിംഗിനു മുമ്പില്‍ പതറിപ്പോയ മുംബൈക്ക് നിശ്ചിത 20 ഓവറില്‍ ചെറിയ സ്‌കോര്‍ മാത്രമേ പടുത്തുയര്‍ത്താനായുള്ളൂ. 43 പന്തില്‍ 51 റണ്‍സ് അടിച്ചെടുത്ത തിലക് വര്‍മയുടെയും 21ല്‍ 32 നേടിയ സൂര്യകുമാര്‍ യാദവിന്റെയും ബാറ്റിംഗാണ് മുംബൈയെ 155ലെങ്കിലും എത്താന്‍ സഹായിച്ചത്. ഋതിക് ഷോകീന്‍ 25 പന്തില്‍ 25 റണ്‍സെടുത്തു.

 

source https://www.sirajlive.com/dhoni-to-be-sacked-chennai-defeated-mumbai-in-a-thrilling-battle.html