ഗര്‍ഭം അലസല്‍ തടയുന്ന മരുന്ന് കാന്‍സര്‍ വരാനുള്ള സാധ്യത വര്‍ധിപ്പിക്കുന്നതായി പഠനം

ടെക്‌സാസ് സിറ്റി| ഗര്‍ഭം അലസല്‍ തടയുന്നതിനായി ഉപയോഗിക്കുന്ന മരുന്ന് കാന്‍സര്‍ വരാനുള്ള സാധ്യത വര്‍ധിപ്പിക്കുന്നതായി പഠനം. ഹ്യൂസ്റ്റണിലെ ടെക്‌സസ് യൂണിവേഴ്‌സിറ്റി ഹെല്‍ത്ത് സയന്‍സ് സെന്ററിലെ ഗവേഷകര്‍ നടത്തിയ പഠനത്തിലാണ് കണ്ടെത്തല്‍. പഠനം ‘അമേരിക്കന്‍ ജേണല്‍ ഓഫ് ഒബ്സ്റ്റട്രിക്സ് ആന്റ് ഗൈനക്കോളജി’യില്‍ പ്രസിദ്ധീകരിച്ചിട്ടുണ്ട്.

17-ഒഎച്ച്പിസി എന്ന മരുന്ന് 1950കളിലും 1960കളിലും സ്ത്രീകള്‍ പതിവായി ഉപയോഗിച്ചിരുന്നതായി ഗവേഷകര്‍ വ്യക്തമാക്കി. അകാല ജനനം തടയാന്‍ സ്ത്രീകള്‍ക്ക് ഇന്നും ഈ മരുന്ന് ഡോക്ടര്‍മാര്‍ നിര്‍ദ്ദേശിക്കുന്നുണ്ട്. ഗര്‍ഭാവസ്ഥയില്‍ ഗര്‍ഭപാത്രം വളരാന്‍ പ്രോജസ്റ്ററോണ്‍ സഹായിക്കുന്നു. കൂടാതെ ഗര്‍ഭം അലസലിലേക്ക് നയിച്ചേക്കാവുന്ന നേരത്തെയുള്ള സങ്കോചങ്ങളും തടയുന്നു.

ഗര്‍ഭാവസ്ഥയില്‍ ഈ മരുന്ന് കഴിക്കുന്ന സ്ത്രീകള്‍ക്ക് മരുന്ന് കഴിക്കാത്ത സ്ത്രീകളെ അപേക്ഷിച്ച് അവരുടെ ജീവിതത്തിലുടനീളം കാന്‍സര്‍ പിടിപെടാനുള്ള സാധ്യത ഇരട്ടിയാണെന്ന് പഠനത്തിന് നേതൃത്വം നല്‍കിയ ഗവേഷകന്‍ കെയ്റ്റ്‌ലിന്‍ സി മര്‍ഫി പറഞ്ഞു. യുടി ഹെല്‍ത്ത് സ്‌കൂള്‍ ഓഫ് പബ്ലിക് ഹെല്‍ത്തില്‍ ഹെല്‍ത്ത് പ്രൊമോഷന്‍ ആന്റ് ബിഹേവിയറല്‍ സയന്‍സസ് വകുപ്പില്‍ അസോസിയേറ്റ് പ്രൊഫസര്‍ കൂടിയാണ് കെയ്റ്റ്‌ലിന്‍.

1959ലും 1967 ജൂണിനും ഇടയില്‍ ഗര്‍ഭകാല പരിചരണം ലഭിച്ച സ്ത്രീകളില്‍ നിന്നുള്ള ഡാറ്റയാണ് ഗവേഷകര്‍ പഠനത്തിനായി ശേഖരിച്ചത്. പഠനത്തിന്റെ ഭാഗമായ 234 ഗര്‍ഭിണികള്‍ 17ഒഎച്ച്പിസിയ്ക്ക് വിധേയരായിട്ടുണ്ടെന്ന് വ്യക്തമായി. വന്‍കുടല്‍ കാന്‍സര്‍, പാന്‍ക്രിയാറ്റിക് കാന്‍സര്‍, തൈറോയ്ഡ് കാന്‍സര്‍ തുടങ്ങി നിരവധി അര്‍ബുദങ്ങള്‍ 1960 കളിലും അതിനുശേഷവും ജനിച്ചവരില്‍ വര്‍ധിക്കുന്നത് കണ്ടിട്ടുണ്ടെന്ന് കെയ്റ്റ്‌ലിന്‍ പറഞ്ഞു. എന്തുകൊണ്ടാണെന്ന് ആര്‍ക്കും അറിയില്ലായിരുന്നുവെന്നും കെയ്റ്റ്‌ലിന്‍ കൂട്ടിച്ചേര്‍ത്തു. 17-ഒഎച്ച്പിസി എടുക്കുന്നത് കൊണ്ട് യാതൊരു പ്രയോജനവുമില്ലെന്ന് അദ്ദേഹം പറയുന്നു. യുഎസ് ഫുഡ് ആന്റ് ഡ്രഗ് അഡ്മിനിസ്‌ട്രേഷന്‍ 2020 ഒക്ടോബറില്‍ ഈ മരുന്ന് വിപണിയില്‍ നിന്ന് പിന്‍വലിക്കാന്‍ നിര്‍ദ്ദേശിച്ചിട്ടുണ്ട്.

 

source https://www.sirajlive.com/studies-show-that-anti-abortion-drugs-increase-the-risk-of-cancer.html