ശമ്പള പരിഷ്‌കരണത്തിലെ അപാകത; പി ജി മെഡിക്കല്‍ ടീച്ചേഴ്‌സ് അസോസിയേഷനും സമരത്തിലേക്ക്

തിരുവനന്തപുരം | മെഡിക്കല്‍ കോളജ് അധ്യാപകരുടെ ശമ്പള പരിഷ്‌കരണം, പ്രമോഷന്‍ എന്നിവയിലെ അപാകതകള്‍ പരിഹരിക്കണമെന്ന് ആവശ്യപ്പെട്ട് കേരള ഗവണ്‍മെന്റ് പി ജി മെഡിക്കല്‍ ടീച്ചേഴ്‌സ് അസോസിയേഷനും സമരത്തിലേക്ക്. നവംബര്‍ 15 ന് മെഡിക്കല്‍ വിദ്യാഭ്യാസ ഡയറക്ടര്‍ ഓഫീസിന് മുമ്പിലും എല്ലാ മെഡിക്കല്‍ കോളജുകളിലും ധര്‍ണ നടത്തും. അത്യാഹിത വിഭാഗം, പ്രസവ മുറി, അടിയന്തര ശസ്ത്രക്രിയകള്‍, കൊവിഡ് ഡ്യൂട്ടി എന്നിവയെ ബാധിക്കാത്ത രീതിയിലാണ് സമരം നടത്തുക. എന്നിട്ടും സര്‍ക്കാറിന്റെ ഭാഗത്തു നിന്ന് അനുകൂല നടപടിയുണ്ടായില്ലെങ്കില്‍ ഡിസംബര്‍ ഒന്ന് മുതല്‍ അനിശ്ചിതകാല സമരം ആരംഭിക്കും. ആവശ്യങ്ങള്‍ പലതവണ സര്‍ക്കാര്‍ മുമ്പാകെ ഉന്നയിച്ചിട്ടും ഫലമില്ലാത്തതിനാലാണ് സമരത്തിന് നിര്‍ബന്ധിതരാകുന്നതെന്ന് സംഘടനാ നേതാക്കള്‍ വ്യക്തമാക്കി.

എന്‍ട്രി കേഡറില്‍ അസിസ്റ്റന്റ് പ്രൊഫസര്‍മാരുടെ വേതന ലെവല്‍ 12 ആക്കി വര്‍ധിപ്പിക്കുക, സൂപ്പര്‍ സ്‌പെഷ്യാലിറ്റി അസിസ്റ്റന്റ് പ്രൊഫസര്‍മാരുടെ ശമ്പള സ്‌കെയില്‍ വര്‍ധിപ്പിക്കുക, അസോസിയേറ്റ് പ്രൊഫസറായുള്ള സ്ഥാനക്കയറ്റ കാലാവധി ഏഴ് വര്‍ഷമാക്കി കുറക്കുക, പ്രൊഫസറായി സ്ഥാനക്കയറ്റത്തിന് മൂന്ന് വര്‍ഷമാക്കിയത് 2016 ജനുവരി ഒന്ന് മുതലാക്കി തീരുമാനിക്കുക, ശമ്പള പരിഷ്‌കരണ ആനുകൂല്യങ്ങള്‍ എല്ലാ മെഡിക്കല്‍ കോളജ് അധ്യാപകര്‍ക്കും ലഭ്യമാക്കുക, 2020 മുതലുള്ള ഡി എ കുടിശ്ശിക അനുവദിക്കുക, പുതിയ മെഡിക്കല്‍ കോളജുകളില്‍ ആവശ്യമായ നിയമനങ്ങള്‍ നടത്തുക, മെഡിക്കല്‍ കോളജ് അധ്യാപകരുടെ പുനര്‍വിന്യാസം റദ്ദാക്കുക തുടങ്ങിയ ആവശ്യങ്ങളാണ് സംഘടന മുന്നോട്ട് വക്കുന്നത്. മെഡിക്കല്‍ കോളജ് ഡോക്ടര്‍മാരുടെ മറ്റൊരു സംഘടനയായ കെ ജി എം സി ടി എ ഇതേ ആവശ്യങ്ങളുന്നയിച്ച് നേരത്തെ തന്നെ സമരത്തിലാണ്.

 

source https://www.sirajlive.com/inadequacies-in-pay-reform-pg-medical-teachers-39-association-also-joined-the-strike.html