പാക്കിസ്ഥാനെ അഞ്ച് വിക്കറ്റിന് തകര്‍ത്തു; ഫൈനലില്‍ കിവീസിനെ നേരിടാന്‍ ഓസീസ്

ദുബൈ | ടി 20 ലോകകപ്പില്‍ ആസ്‌ത്രേലിയ-ന്യൂസിലന്‍ഡ് പോരാട്ടം. രണ്ടാം സെമിയില്‍ പാക്കിസ്ഥാനെ അഞ്ച് വിക്കറ്റിന് തകര്‍ത്ത് ആസ്‌ത്രേലിയ ഫൈനലിലേക്ക് മാര്‍ച്ച് ചെയ്തു. ആദ്യം ബാറ്റ് ചെയ്ത് നിശ്ചിത 20 ഓവറില്‍ പാക്കിസ്ഥാന്‍ നേടിയ 176 റണ്‍സ് അവസാന ഓവര്‍ ശേഷിക്കേ ഓസീസ് മറികടന്നു. ആദ്യം ഡേവിഡ് വാര്‍നര്‍-മിഷേല്‍ മാര്‍ഷ് സഖ്യവും പിന്നീട് മാര്‍കസ് സ്റ്റോയിനിസ്, മാത്യു വേഡ് കൂട്ടുക്കെട്ടും നടത്തിയ വെടിക്കെട്ടാണ് ആസ്‌ത്രേലിയക്ക് തകര്‍പ്പന്‍ വിജയം സമ്മാനിച്ചത്.

മത്സരം അന്തിമ ഘട്ടത്തിലേക്ക് കടക്കും വരെയും പാക്കിസ്ഥാനായിരുന്നു വിന്‍ പ്രെഡിക്ടറില്‍ ഏറെ മുന്നിട്ട് നിന്നത്. എന്നാല്‍, അവസാന ഓവറുകളില്‍ കത്തിക്കയറിയ മാത്യു വേഡും മാര്‍കസ് സ്‌റ്റോയിനിസും ചേര്‍ന്ന് പാക്കിസ്ഥാനില്‍ നിന്ന് വിജയം കൊത്തിയെടുക്കുകയായിരുന്നു. 17 പന്തുകളില്‍ 41 റണ്‍സാണ് വേഡ് അടിച്ചെടുത്തത്. 30 പന്തില്‍ 40 ആയിരുന്നു സ്റ്റോയിനിസിന്റെ സംഭാവന. ഇരുവരും പുറത്താകാതെ നിന്നു. ഓസീസ് ബാറ്റിംഗിന്റെ തുടക്കത്തില്‍ 30 പന്ത് മാത്രം നേരിട്ട് 49ല്‍ എത്തിയ ഡേവിഡ് വാര്‍നറും 22 പന്തില്‍ 28 റണ്‍സ് നേടിയ മിഷേല്‍ മാര്‍ഷുമാണ് വിജയത്തിന് അടിത്തറ പാകിയത്.

 

source https://www.sirajlive.com/defeated-pakistan-by-five-wickets-australia-to-face-kiwis-in-final.html