ലീഗ് കളം മാറില്ല; സോണിയക്ക് സ്വാദിഖ് അലി തങ്ങളുടെ കത്ത്

ന്യൂഡൽഹി | കോൺഗ്രസ്സിന് സമ്പൂർണ പിന്തുണ അറിയിച്ച് മുസ്‌ലിം ലീഗ് സംസ്ഥാന അധ്യക്ഷൻ സ്വാദിഖ് അലി ശിഹാബ് തങ്ങൾ കോൺഗ്രസ്സ് അധ്യക്ഷ സോണിയാ ഗാന്ധിക്ക് കത്ത് നൽകി. പാർട്ടി എം പിമാരായ ഇ ടി മുഹമ്മദ് ബഷീർ, ഡോ. എം പി അബ്ദുസ്സമദ് സമദാനി, നവാസ് ഗനി എന്നിവരാണ് കത്ത് കൈമാറിയത്. ജനാധിപത്യ സംരക്ഷണത്തിന്റെ പാതയിൽ കോൺഗ്രസ്സ് നേരിടുന്ന എല്ലാ പ്രതിസന്ധികളെയും നേരിടാൻ ലീഗ് ശക്തമായ പിന്തുണ നൽകുമെന്ന് സ്വാദിഖലി ശിഹാബ് തങ്ങൾ കത്തിൽ വ്യക്തമാക്കി. വിഷമ സാഹചര്യത്തിൽ കോൺഗ്രസ്സിന് കൃത്യമായ പിന്തുണയും സഹകരണവും ആവർത്തിച്ചു പ്രഖ്യാപിക്കുന്നതിൽ ലീഗിന് സന്തോഷമേയുള്ളൂ.

ബി ജെ പി സർക്കാർ എൻഫോഴ്‌സ്‌മെന്റ് ഡയറക്ടറേറ്റിനെ അടക്കം ഉപയോഗപ്പെടുത്തി വളരെ നീചമായ വിധത്തിൽ നടത്തിക്കൊണ്ടിരിക്കുന്ന ഹീനമായ പ്രവർത്തനങ്ങളെ ശക്തമായി അപലപിക്കുന്നു. ബി ജെ പിയുടെ ഇത്തരം നീക്കങ്ങൾക്കെതിരെ പ്രതിപക്ഷ പാർട്ടികളുടെ രാഷ്ട്രീയ ചേരി ഒരുക്കേണ്ടത് അനിവാര്യമാണെന്നും കത്തിൽ പറയുന്നു. ലീഗിന്റെ നിലപാടിൽ സോണിയാ ഗാന്ധി സന്തോഷം രേഖപ്പെടുത്തിയതായി പാർട്ടി എം പിമാർ അറിയിച്ചു. ലീഗിലെ ഒരു വിഭാഗം ഇടതുപക്ഷവുമായി അടുക്കുന്നുവെന്ന ആരോപണങ്ങൾ ഉയരുന്നതിനിടെയാണ് കോൺഗ്രസ്സിന് പൂർണ പിന്തുണ അറിയിച്ച് സ്വാദിഖ് അലി തങ്ങൾ കത്ത് നൽകിയിരിക്കുന്നത്.

സ്വർണക്കടത്ത് കേസിൽ കോൺഗ്രസ്സ് ശക്തമായ സമര രംഗത്ത് വന്നിട്ടും ലീഗ് മാറി നിന്നതും അടുത്തിടെ കൊച്ചിയിൽ ചേർന്ന പ്രവർത്തക സിമിതിയിൽ ഒരു വിഭാഗം നേതാക്കൾ ഇടതുപക്ഷത്തോട് അടുക്കണമെന്ന് ആവശ്യപ്പെട്ടതും ലീഗ് യു ഡി എഫ് വിടുന്നുവെന്ന പ്രചാരണം ശക്തമാക്കിയിരുന്നു. കോൺഗ്രസ്സ് നേതാക്കൾക്കിടയിലും പ്രവർത്തകർക്കിടയിലും ഇത് വലിയ ആശങ്ക സൃഷ്ടിക്കുകയും ചെയ്തിരുന്നു. ഈ സാഹചര്യത്തിലാണ് കോൺഗ്രസ്സിന് സമ്പൂർണ പിന്തുണ അറിയിച്ച് സോണിയാ ഗാന്ധിക്ക് സ്വാദിഖ് അലി തങ്ങൾ കത്ത് നൽകിയിരിക്കുന്നത്.

source https://www.sirajlive.com/the-league-field-will-not-change-swadiq-ali-39-s-letter-to-sonia.html