എസ് എസ് എൽ സി, പ്ലസ് ടു മൂല്യനിർണയം ഇന്ന് മുതൽ

തിരുവനന്തപുരം | സംസ്ഥാനത്ത്‌ എസ്‌ എസ്‌ എൽ സി, രണ്ടാം വർഷ ഹയർ സെക്കൻഡറി പരീക്ഷകളുടെ ഉത്തരക്കടലാസുകളുടെ മൂല്യനിർണയം ഇന്ന് ആരംഭിക്കും. 4.20 ലക്ഷം എസ്‌ എസ്‌ എൽ സി വിദ്യാർഥികളുടെ മൂല്യനിർണയത്തിന്‌ 70 ക്യാമ്പാണ് സജ്ജമാക്കിയത്‌. ഈ മാസം 26 വരെ നടക്കുന്ന മൂല്യനിർണയത്തിനായി 18,000 അധ്യാപകരെയാണ് നിയോഗിച്ചത്.

കൂടാതെ, 42 ലക്ഷം വിദ്യാർഥികളുടെ പ്ലസ്‌ടു മൂല്യനിർണയത്തിന്‌ കാൽ ലക്ഷം അധ്യാപകരെ ചുമതലപ്പെടുത്തി. 80 ക്യാമ്പുകളുണ്ട്‌. മെയ്‌ ആദ്യവാരം ഇവ പൂർത്തിയാകും. സമാന്തരമായി ബുധനാഴ്‌ച ടാബുലേഷൻ പ്രവർത്തനങ്ങൾ പരീക്ഷാഭവനിൽ ആരംഭിക്കും. എസ്‌ എസ്‌ എൽ സി, പ്ലസ്‌ടു ഫലം മെയ്‌ ഇരുപതിനകം പ്രസിദ്ധീകരിക്കാനാണ് വിദ്യാഭ്യാസ വകുപ്പിൻ്റെ നീക്കം.

വൊക്കേഷണൽ ഹയർ സെക്കൻഡറിയിൽ എട്ട് മൂല്യനിർണയ കേന്ദ്രത്തിലായി 3,500 അധ്യാപകരെ വിന്യസിച്ചു. പ്ലസ്‌ടു പൂർത്തിയായശേഷം പ്ലസ്‌വൺ മൂല്യനിർണയം ആരംഭിക്കും. മുൻ വർഷത്തേതുപോലെ ചില ഹയർ സെക്കൻഡറി കാറ്റഗറി സംഘടനകൾ  ക്യാമ്പുകളിൽ പ്രതിഷേധത്തിന്‌ ശ്രമിക്കുന്നുണ്ട്‌. ക്യാമ്പുകളില്‍ എത്താത്ത അധ്യാപകർക്കെതിരെ കർശന നടപടി സ്വീകരിക്കുമെന്ന്‌ പൊതുവിദ്യാഭ്യാസ ഡയറക്ടർ കെ ജീവൻ ബാബു വ്യക്തമാക്കി.

source https://www.sirajlive.com/sslc-plus-two-assessment-from-today.html